BAGUIO CITY – Nalatak ti pannarita nga “aanhin pa ang damo kung patay na ang kabayo.”
No kitaen tayo ti sitwasyon iti agdama, kasla kastoy ti mapaspasamak kadagiti healthcare workers nga agserserbi kas frontliners iti laban kontra iti COVID-19 pandemic.
Daytoy ket gapu ta arigna mabaybay-an dagiti healthcare workers, awan ti usto nga inana dagitoy bayat a dagiti naikari a benepisio ket saan pay a naipapaay kadakuada.
Iti napalabas nga interbyu ti Bombo Radyo iti dadaulo ti grupo dagiti nurses ditoy pagilian, naibutaktak nga agingga ita ket saan pay a naaw-awat dagiti healthcare workers ti naikari a benepisio para kadakuada a nakalanad iti Bayanihan To Heal As One Act.
No kitaen ti rekord ti Department of Health, dumanon itan iti 12,412 dagiti health workers a nagpositibo iti COVID-19 ditoy Pilipinas ken 75 kadagitoy ti pimmusay.
Makita iti daytoy nga uray pay makuna a health workers dagitoy ket delikado latta ti kasasaadda isut gapuna a masapul a maipaayan met dagitoy iti umno nga atension ken tulong.
Kinuna pay ti grupo dagiti nurse a bassit unay ti sueldo dagitoy bayat a dakkel ti mabalin a masweldoda no apanda iti ballasiw-taaw, ngem gapu ta limitado ti bilang dagiti mapalubusan nga agturong iti ballasiw-taaw ket awan ti mabalinda no di ti saan nga agtalinaed ditoy Pilipinas uray kurang ti maaw-awatda a benepisio.
Ti saludsod ita, urayen pay ngata ti gobierno a manayonan manen dagiti healthcare workers a makaptan iti COVID-19 ken pumusay gapu iti nasao a sakit sakbay a maipaay ti tulong kadakuada?
Kas iti pagsasao nga aanhin pa ang damo kung patay na ang kabayo, nasaysayaat a maipaay ita kadagiti healthcare workers ti benepisio a maikari para kadakuada, saan ket nga inton agsakit wenno pumusay dagitoy gapu ta kas iti natayen a kabalyo a saannan a marikna uray ikkan iti adu a nalangto a ruot, kasta met kadagiti healthcare workers, saandan ton a marikna no maladaw ti pannakaipaay ti tulong kadakuada.
