Naapektaran ti turismo idiay munisipyo ti Atok, Benguet kalpasan ti panagdalapus ti bagyo a Kristine ken Leon.
Iti pannakiuman ti Bombo Radyo kenni Angelito Galao Sr., bise mayor ti Atok, nadadael dagiti mula a sabong kadagiti nagduduma a pagpasyaran iti nasao a munisipyo a pakairamanan ti Northern Blossoms.
Gapu iti dayta, bimmaba ti bilang dagiti turista a bimmisita iti nasao a munisipyo.
Innayon pay ni Vice Mayor Galao nga adu dagiti turista nga agreklamo a nailaw-an a bimmisita gapu ta awan ti makitada a sabong iti nalalatak a pagpasyaran iti nasao a munisipyo.
Nupay kasta, en-entertainen latta dagiti nagduduma a tourist attraction owners dagiti bimmisita kadagiti tourist spots sadiay.
Malaksid iti dayta, maysa pay a posible a mang-apektar iti turismo ti Atok ket ti posible a panagdalapus ti Tropical Storm Marce.
Gapu iti daytoy, sinuspindir ti opisina ti Mayor ti turismo iti nasao a munisipyo ita nga aldaw.
Maibasar iti imparuar ti nasao nga opisina nga order, napateg a mapasigurado ti seguridad dagiti agpasyar a turista.
