![](https://img.bomboradyo.com/baguio/2021/03/rose-garden-baguio-city-12.jpg)
BAGUIO CITY–Saan nga awaten ti Baguio City dagiti turista manipud kadagiti COVID-19 high-risk areas kas iti NCR, Cavite, Bulacan, Laguna ken Rizal.
Inlawlawag ni Mayor Benjamin Magalong a paset daytoy ti panagannad ti siudad kasaruno ti panagngato ti kaso ti COVID-19 kadagiti nasao a lugar ken kas maitunos iti Resolution 104 ti National IATF tapnu makontrol ti panaggaraw dagiti tattao ken ti ad-adda a panakaiwaras ti COVID-19.
Kinunana nga iti nasao nga addang ket mapukaw ti agarup 70% iti turista nga agturong kuma ditoy siudad.
Innayonna a manamnama a maksayan ti bilang dagiti turista nga agturong ditoy Baguio nangruna inton Semana Santa.
Sigun pay iti mayor, ikanselar ti lokal a gobyerno ti aplikasyon dagiti turista nga addaan address kadagiti nasao a lugar.
Kagiddan iti daytoy, imbalakad manen ni Mayor Magalong ti agtultuloy a panagsurot ti publiko kadagiti public health standards nangruna ita nga adda ti ordinansa ti Baguio seknan iti kanayon a panagsuot ti face mask ken face shield tunggal agturong kadagiti parapubliko a lugar.