Pagdandanagan ti Bureau of Immigration (BI) ti panagngato ti kaso dagiti Pilipino a mairamraman iti trafficking dagiti sindikato.
Kasaruno daytoy iti 14 a Pilipino a naipasubli iti pagilian, kalpasan a nabiktimada iti Human trafficking.
Nakuna ti protection and border enforcement section (I-PROBES) ti immigration a simmangpet dagiti 14 a Pilipino idi July 30 nanipud sadiay Kuala Lumpur, Malaysia, Phnom Penh, ken Cambodia.
Kadagiti nasao a bilang dagiti biktima, 12 ti nagna iti southern backdoor paturong sadiay Malaysia bayat a dua kadagitoy ti immikkat babaen iti Ninoy Aquino International Airport (NAIA).
Sigun kadagiti biktima, naikari kadakuada nga agtrabahoda sadiay Laos kas office staff ken naidiaya kadakuada ti P50,000 tunggal bulan a sueldo.
Iti sabali a bangir, kinuna dagiti biktima manipud sadiay Cambodia a naidiaya kadakuada ti trabaho kas customer service representatives, ken naikari kadakuada nga umawatda iti sueldo a $1,000 iti binulan.
Nupay kasta, nagtrabaho dagitoy kas scammers ken nakapasarda iti pisikal a panagabuso iti kanito a saanda a maala ti quota dagitoy.
Sigun kenni Bureau of Immigration (BI) Commissioner Joel Anthony Viado, immadu ti bilang dagiti umik-ikkat iti pagilian babaen iti southern backdoor route no sadino, kaaduan kadagiti biktima ket mailuglugan iti barko manipud Zamboanga agingga sadiay Malaysia.
