BAGUIO CITY – Makipatang ti Commision on Elections (COMELEC) – Bangued, Abra iti Abra Electric Cooperative ken iti National Grid Corporation of the Philippines tapno maipanamnama nga umdas ti suplay ti kuryente a maaramat sadiay para iti masungad nga eleksiyon.
Iti interview ti Bombo Radyo kenni Atty. John Paul Martin, election officer ti Bangued, Abra, nasken a maipanamnama nga umdas ti power supply tapno adda ti silaw nga aramaten dagiti botante a kumamakam nga agbotos iti alas sais ti rabii.
Inlawlawagna nga awan ti parikot kadagiti Vote Counting Machines uray maawan ti suplay ti kuryente gaputa adda ti extra a baterya dagitoy ngem ti parikot ket dagiti maaramat a silaw.
– paset ti interview ti Bombo Radyo kenni Atty. John Paul Martin, election officer ti Bangued, Abra
Gapu iti daytoy, kinunana a posible nga agaramat ti komisyon iti lighting facilities.
Innayon pay ni Atty. Martin a makipatang met laeng ti COMELEC kadagiti opisyal dagiti barangay tapno adda dagiti maipabulod a generators ken emergency lights a maaramat sadiay Bangued, Abra inton eleksyon.
