BAGUIO CITY – Maipasidong iti psychological intervention dagiti residente kadagiti innem a babbarangay ti Bauko, Mountain Province a naapektaran kadagiti engkwentro iti nagbaetan ti tropa ti gobyerno ken dagiti komunista a New People’s Army (NPA).
Sigun iti mayor ti Bauko, adda dagiti residente kadagiti barangay ti Balintaugan, Bila, Bagnen Proper, Bagnen Oriente, Poblacion ken Abatan a na-trauma gapu kadagiti insidente a kasapulan a maipasidong iti debriefing.
Kinunana nga imbilinna ti panangplano dagiti amin a departamento ti lokal a gobyerno ti Bauko iti panakaisayangkat ti nasao a debriefing iti nasurok sangaribo a residente.
Idauluan ti municipal social work office, municipal health office ken ti Department of Health ti nasao a psychological intervention.
Dinakamatna a daytoy ti kaunaan a gunaway a nakangngeg dagiti umili ti Bauko iti rinnupak iti nagbaetan ti tropa ti gobyerno ken dagiti komunista a nakaaramatan ti de kalibre nga aramas a pimmaut iti nabayag nga oras.
Sigun kenkuana, nabutngan dagiti umili ken adda paylaeng dagitoy iti state of recovery.
Innayon ti mayor nga adda pay dagiti residente iti lima a barangay sadiay Bauko a napilitan a nagbakwit kalpasan ti rinnupak ken kalpasan ti panagbettak ti improvised explosive device.
Nangipaay met ti lokal a gobyerno iti food packs, family packs ken hygiene kits kadagiti apektado a residente.
Agtaltalinaed met ti balakad kadagiti residente a liklikanda pay ti agturong kadagiti taltalon gaputa saan pay a maibaga a natalged ti lugar manipud kadagiti rebelde.
Mangnamnama ti mayor a makabangon dagiti residente ti Bauko, Mt. Province babaen iti panagtitinnulong dagitoy.
Kagiddan iti daytoy, inyapelana ti panaka-adda ti kappia sadiay Bauko ken ti saan a panangitugot iti igam dagiti pulis, militar ken rebelde no agturongda sadiay.
Innayon ti mayor nga ad-adalenna ti singasing ti sumagmamano a sektor a panakaideklara ti Bauko kas maysa a ‘peace zone’.
