BAGUIO CITY- Inyunay-unay ti COMELEC-Cordillera ti panangsurot dagiti botantes kadagiti pammilin iti umno a panagbotos iti masungad nga eleksion.
Sigun iti ahensia, naobserbaran kadagiti naglabas nga eleksion nga adda dagiti overshaded a balota.
Innayon pay ti ahensia a nasobraan ti bilang dagiti kandidato a minarkaan dagiti botantes iti maysa a posision.
Impetteng ti ahensia nga impadasda nga inkarga dagiti overshaded ken overvoted a balota iti vote counting machine ken naamoan a saan a naibilang daytoy iti resulta ti botos.
Gapu iti daytoy, iyap-apela ti COMELEC ti umno a panangshade kadagiti balota ken ti panangmarka iti eksakto a bilang dagiti kandidato tapno maibilang ti botos dagitoy.
Naituding nga agbotos dagiti local absentee voting manipud alas otso ti agsapa agingga alas singko ti malem inton Abril 27 agingga Abril 29 ti agdama a tawen.
Maipatungpal met ti panagbotos dagiti local voters manipud alas sais ti agsapa agingga alas siete ti rabii bayat nga alas siete ti agsapa agingga alas dos ti malem ti panagbotos met dagiti persons deprived of liberty (balod) inton Mayo nuebe ti agdama a tawen.
