Tinagiragsak dagiti nagduduma a sektor ti umuna a pannakarambak ti Ibaloy Day sadiay Rose Garden ita nga aldaw.
Saan laeng a dagiti Ibaloys ti nangrambak iti daytoy no di ket pakairamanan metlaeng dagiti Kankana-eys, Ifugao federation, turista, ken dadduma pay.
Iti panakiuman ti Bombo Radyo ken da Joclyn Cuyan Coldeg ken Marion Pool, pareho a miyembro iti Picnay-Pinaoan Clan, kinuna dagitoy a maragsakanda ken kayatda nga ipannakel no kasnao ti panagkaykaysa dagiti Ibalois manipud kadagiti nagduduma a lugar ken clan tapno rambakan ti maika-sangapulo ket innem nga Ibaloy Day.
Sigun kenni Coldeg, maragsakanda gapu ta maysa dagiti Ibalois nga immuna a nagnaed iti siyudad ti Baguio kasta met a sipapanakkelda a nabaelanda nga inpreserpa ti kultura dagitoy kasta met ti panaka-aywan ti aglawlaw partikular iti Ibaloi Park wenno Igorot Heritage Garden.
Malaksid iti dayta, gapu ta maramrambakan met laeng ti International Women’s Day, impeksa ni Coldeg a mangipakita iti panagkaykaysa, kinatibker dagiti babbai.//Bombo Genzel Depayso
