BAGUIO CITY – Agipila iti motion for reconsideration ti mayoralty candidate ti Baguio a ni Atty. Edgar Avila sadiay COMELEC Central Office inton Lunes wenno Martes para iti sangsangwenna a disqualification case iti masungad a 2019 midterm elections.
Naipaayan daytoy iti lima nga aldaw nga agipila iti sungbat kalpasan a naawatna ti minute resolution ti COMELEC en banc a nangilanad a saanda a bigbigbigen ti certificate of candidacy (COC) nga impilana gaputa nagaramat iti daan a porma.
Kinuna ti kandidato a mabalin metlaeng nga agisumitir ti kampona iti Petition for Writ of Certiorari sadiay Korte Suprema tapnu mapapartak wenno dagus a marisut ti isyu sakbay ti eleksiyon.
Sigun kenkuana, adda dagiti nakita ti legal team-na a panaglabsing ti COMELEC kas iti saan a panakaiserbi kenkuana ti notice nga adda ti parikut iti COC nga impilana ken awan ti naipatungpal a panagdengngeg iti panakadiskwalipikarna.
Nagramot ti isyu iti panakapaay ti kandidato a mangaramat iti baro a COC form nga addaan iti Item No. 22 kas maitunos iti resolusyon ti komisyon a nangilanad a nasken a ti baro a COC form ti aramaten dagiti agipila iti daytoy.
Inyunay-unay ti kandidato a saan a naipaayan daytoy iti umno a proseso isut gapuna a maibilang nga awanan bileg ti nasao a minute resolution ti en banc ti COMELEC nangruna ta nagtungpal met daytoy iti amin a proseso.
Dinakamatna pay ti desisyon ti Korte Suprema iti maysa a kaso a ti error in form wenno panaka-aramat ti biddut a porma ket saan a basaran ti panakadiskwalipikar gaputa madiskwalipikar laeng ti maysa a kandidato no nagulbod daytoy kadagiti impormasyon nga inlanadna iti COC.
