BAGUIO CITY – Tarigagay ti Pamilya Dormitorio a natiber a talaga ti kaso a maipila kontra kadagiti pito a kadete a nangmaltrato iti daydi 4th Class Cadet Darwin Dormitorio.
Sigun kenni Dexter Dormitorio, inauna a kabsat ti pimmusay a kadete, kasapulanda paylaeng nga ipinal dagiti paperworks gaputa kayatda a kompleto ken pulido unay dagiti kaso a maipila iti piskalya.
Kinunana a kayatda a maiserbi ti hustisya iti napagteng ti inaudi a kabsatna ken kayatda pay a prebentaran ti panakapasamak manen ti hazing iti aniaman nga institusyon ken aniaman nga organisasyon.
Dinakamatna a kayatda nga amin a responsable iti napasamak iti kabsatna ket nasken nga agsungbat iti sidong ti linteg a maipatpatungpal iti pagilian.
Innayonna a kayatda pay a maisimpa wenno matarimaan ti reputasyon ti Philippine Military Academy (PMA) a nadadael gapu iti napasamak iti kabsatna iti uneg ti akademya.
Sigun pay kenni Dexter Dormitorio, para iti kabsatna ket kayatda a maisardengen ti hazing ken masalwadan dagiti ubbing a kayatda ti sumrek iti akademya ken iti dadduma nga organisasyon.
Kinunana met a ‘very satisfied’ daytoy iti Baguio City Police Office ken iti PMA iti benneg ti suporta dagitoy kadakuada.
Impettengna a ti kinaranggas ket saan a wagas tapnu isuro ti disiplina.
Kinumpirmar ti legal council ti pamilya Dormitorio a saan laeng a maymaysa a kaso ti ipilada kontra kadagiti responsable iti panakamaltrato daydi 4th Class Cadet Darwin Dormitorio a nagresulta iti ipupusay daytoy.
Sigun kenni Atty. Jose Adrian Bonifacio, ‘very complicated’ ti kaso ken makitan to ti kinarikut daytoy iti kanito a maipilan iti piskalya.
Nupay kasta, kinunana a nasken a klaro ken umno ti kaso a maipila iti piskalya gaputa saanda a kayat a maibasura laeng ti ipilada a kaso.
Dinakamatna pay a ti agdesisyon iti umno a kaso a maipila kontra kadagiti suspek ket ti City Prosecutor’s Office ti Baguio ngem kayatda nga ipresenta iti piskalya ti natibker nga ebidensia a supsuportaran dagiti nasapataan a salaysay ken dadduma nga ebidensia a naala dagiti imbestigador iti kaso daydi Cadet Dormitorio.
Kabayatanna, kinuna ni PCol Allen Rae Co, direktor ti Baguio City PNP a dakkel ti posibilidad nga inton sumaruno a lawas ti panakaipila dagiti kaso kontra kadagiti kadete a suspek iti kaso daydi Cadet Dormitorio.
Kabayatanna, idi kalman ket naipasidong iti briefing sadiay Baguio City PNP da Dexter Dormitorio ken Atty. Bonifacio seknan kadagiti kaso a maipila kontra kadagiti suspek a nangmaltrato iti daydi Cadet Dormitorio.
Nupay kasta, ‘off the press’ wenno saan a nailukat iti media ti nasao a briefing nga indauluan ni PCol Co.
Naamuan a ni Atty. Jose Adrian Bonifacio a taga-Baguio City ken ti dua pay a kadwana nga Igorot lawyers ti agserbi a legal council ti pamilya Dormitorio nga agbalin a complainant iti kaso.
Naipasngay ken dimmakkel ditoy Baguio ni Atty. Bonifacio nga ita ket Department Head ti Political Law and Criminal Law iti SLU-School of Law.
Immuna metten a nabigbig dagiti kadete a nangparparigat iti daydi Cadet Dormitorio a da Cadet 3rd Class Felix Lumbag Jr., Cadet 3rd Class Shalimar Imperial Jr., Cadet 1st Class Axl Rey Sanopao, Cadet 3rd Class John Vincent Manalo, Cadet 2nd Class Christian Zacarias, Cadet 3rd Class Rey David John Volante ken Cadet 3rd Class Julius Carlo Tadena.
Maiyakar met iti kustodiya ti Baguio City Jail dagiti suspek a kadete iti kanito nga adda ti pammilin manipud iti piskalya. (-with Bombo Brigitte Marcasi)
