BAGUIO CITY – Nadismaya ti mayor ti La Trinidad, Benguet iti saan a panangipangag dagiti chicken dung dealers a masarakan sadiay Barangay Shilan iti nabayagen a pammilin ti lokal a gobyerno a panangisardengda iti operasyonda sadiay.
Sigun kenni Mayor Romeo Salda, idi pay November 2019 nga imbilin ti Benguet Regional Trial Court ti panakaisardeng ti operasion dagiti chicken dung dealers gaputa mangituntunda daytoy iti polusyon ti angin.
Maipalagip nga irekreklamo dagiti maseknan nga umili sadiay ti kina-angot dagiti mailaklako nga abono a nagtaud iti rugit ti manok ken ti saan nga organisado a panakaimanehar dagiti paglakuan.
Saan pay a nagustuan ti mayor ti saan a panakipaspaset dagiti chicken dung dealers kadagiti taripnong nga ipatpatungpal dagiti maseknan nga otoridad tapno mapagsaritaan ti nasao a pakaseknan.
Immunan a nangisayangkat ti lokal a gobyerno ti Shilan iti public consultation idi napalabas a Sabado ngem saan a nakitaripnong dagiti maseknan a chicken dung dealers iti baet a napaka-ammuan dagitoy.
