BAGUIO CITY – Nakumpirmaren ti pakabigbigan dagiti tallo nga armado a lallaki a maatap a kameng ti maysa a robbery hold-up/carnapping group a bin-ig a pimmusay kalpasan ti panakipinnaltogda kadagiti pulis iti deppaar ti Lamut-Shilan Road sadiay La Trinidad, Benguet idi Biyernes, December 10, 2021.
Maibasar iti progress report ti pulisya, ti umuna a bangkay a nakasuot ti puraw a sweatshirt ken jogging pants ket ni Marvin Velasco Almeida.
Nabigbig daytoy babaen iti kabsatna a ni Mary Grace Almeida Mori.
Sigun kenni Mary Grace, agsapa ti December 9 idi sinukon ti mannagan Bigboy ti kabsatna ken saanda nga ammo ti nagturongan dagitoy.
Naamuanda laengen a ni Bigboy ket ni Bart Batolo.
Nabigbig met ti maikadua a bangkay a nakasuot ti light brown jacket, gray shirt ken black maong pants a ni Bart Maria Niño Punu Bartolo.
Nabigbig daytoy babaen ti asawana a ni Katrina Mae Manalastas.
Sigun kenni Katrina Mae, naudi a nakasaritana ti asawana idi agsapa ti December 8 agingga a saandan a matawagan ti cellphone daytoy.
Nabigbig met ti maikatlo a bangkay a ni Rolando Guevarra Mendoza.
Nabigbig daytoy babaen iti live-in partner-na a ni Susana Paguio.
Sigun kenni Susana, agsapa ti December 8 idi nagpakada ni Mendoza a makisinnabat kenni Bartolo agingga a saanen a nagaw-awid.
Nagturong ditoy Baguio City dagiti kabagian dagiti tallo ken naipaima kadakuada dagiti bangkay ken kagawaan dagitoy.
Naamuan a naiyawid sadiay Mabalacat, Pampanga ti bangkay ni Marvin Almeida bayat a naiyawid met sadiay Mexico, Pampanga ti bangkay ni Roland Mendoza.
Naipasidong met iti cremation ti bangkay ni Bart Bartolo sakbay a naiyawid ti dapona sadiay Pandacaqui, Mexico, Pampanga.
Maipalagip a nagresponde ti pulisya iti reklamo dagiti umili ti La Trinidad mainaig iti mapagduadua-an a nalabbaga a sedan nga agrikrikos sadiay iti dis-oras ti rabii.
Asitgan kuma ti maysa a pulis ti nasao a kotse tapnu sitaen ti driver gapu iti kinakurang ti plaka daytoy iti likod ngem killaat a nagpaputok ti paltog ti maysa kadagiti nakalugan iti kotse.
Kalpasanna, naglibas ti kotse paturong iti Lamut-Shilan Road isut gapuna a kinamat daytoy dagiti pulis.
Nupay kasta, naidungpar ti kotse iti igid ti kalsada isut gapuna a napalawlawan daytoy dagiti pulis.
Naibilin ti panagsuko dagiti nakalugan iti kotse ngem ginandatda a tumaray nga aglibas kagiddan ti panagpaputokda ti paltog kadagiti pulis.
Gapu iti daytoy, nagbales dagiti pulis a nagresulta iti dagus nga ipupusay da Marvin Almeida ken Bart Bartolo bayat a dead on arrival iti pagagasan ni Roland Mendoza.
Nakumpiskar pay iti nakapasamakan ti shoot-out ti tallo a caliber 45 pistol a mapapati nga inaramat dagiti tallo nga indibidual.
