BAGUIO CITY – Direkta nga imbaga ti ina ti maysa kadagiti tallo a biktima iti pammaltog sadiay Baybayating, Collago, Lagayan, Abra a ‘pulitika’ ti rason iti nasao a krimen.
Iti panakiyuman ti Bombo Radyo, kinuna ni Alicia Parado, ina ti pimmusay a ni Jhudges Castañeda Parado a dagitoy ket taga-suportar ti agkandidato a mayor ti munisipyoda bayat a dagiti suspek ket taga-suportar met ti agdama a mayor ti Lagayan.
Kinunana a posible a naka-unget dagiti suspek gaputa ti kalaban dagitoy a kandidato ti supsuportaran ti grupo dagiti biktima.
Maipalagip a pimmusay iti pagagasan ti biktima a ni Parado bayat a nadangran da Leomar Parado Santos ken Moises Gomez Salingbay.
Simmuko metten iti pulisya dagiti suspek a da barangay kagawad Jerry Tabas aka Valentin; Henry Tabas aka Kondari; Juny Tabas aka Abbak ken Lagayan Punong Barangay Dominador Cardinas Jr. aka Jun Jun.
Nupay kasta, desidiso ti pamilya dagiti biktima a mangipila ti kaso kontra kadagiti suspek gaputa kayatda a sumardeng metten ti kinaranggas iti lugarda ken tapnu maisurwan iti leksiyon dagiti suspek. (Bombo Radyo Vigan)
