BAGUIO CITY – Nagsublin dagiti residente ti Sitio Pinugao, Barangay Namal sadiay Asipulo, Ifugao kalpasan a nagbakwitda gapu iti napasamak nga engkwentro iti nagbaetan ti 54th Infantry Battalion, Philippine Army ken ti rebelde a grupo ti New People’s Army (NPA) idi napalabas a lawas.
Sigun kenni Lt. Col. Nicolas Quemado Jr., commanding officer ti 54th IB, natalinaay itan dagiti lugar sadiay Ifugao a narirbok gapu iti presensia dagiti rebelde sadiay ken ti nasao nga engkwentro.
Innayonna nga aginga ita ket agtultuloy ti clearing operation dagitoy sadiay Barangay Namal ken awan pay ti nagkamkamang kadakuada a kameng ti rebelde a grupo a nadangran iti engkwentroda idi napalabas a lawas.
Immunan nga inyapelana ti panagpataming dagiti nadangran a rebelde kadagiti doktor ti militar.
