Nalapdan ti Bureau of Immigration a makastrek iti Pilipinas dagiti 4 nga Amerikano a mapapati a “pedophiles” iti Ninoy Aquino International Airport (NAIA) iti napalabas a tallo a lawas.
Sigun iti nasao nga ahensia, ti umuna nga Amerikano ket sigud nga American serviceman a ni Henry Glasgow, ken nakonbiktar daytoy iti child pornography idi 2005 ken nasentensian ti sangapulo a tawen a pannakaibalud.
Nalapdan daytoy iti Ninoy Aquino International Airport Terminal 3 idi Oktubre 8.
Maikadua ket ni Daniel Clare Rademacher, agtawen ti 63 ken nakonbiktar idi 2004 para iti dua a kaso a criminal sexual conduct nga adda pakainaigan ti agtawen ti 15 a babai, iti Ninoy Aquino International Airport Terminal 1n idi Oktubre 9.
Idi Oktubre 12, nalapdan met ti agtawen ti 20 a ni Khallif Francis Ammen iti Ninoy Aquino International Airport Terminal 1 a nakonbiktar iti child pornography ken possession of lewd materials iti agtawen ti 11 idi tawen 2016.
Ti maudi ket ni Brian William Sanchez, agtawen ti 68 a nakonbiktar ti child pornography idi tawen 2003.
Sigun kenni BI Commissioner Joel Anthony Viado, saanda a nakastrek kalpasan a naduktalan dagiti immigration officers a karaman dagitoy iti listaan dagiti ganganaet a nakonbiktar ti “sex crimes” iti nagtaudanda a pagilian.
Naipasubli metten dagitoy iti nagtaudanda a pagilian.
