Itantandudo ti Department of Environment and Natural Resources ti pannakaipasdek ti urban green spaces tapno mapababa ti nangato a heat index iti Pilipinas.
Sigun iti nasao nga ahensia, makatulong pay ti urban green spaces a mangkessay iti epekto ti Urban Heat Island ken makatulong a mangkessay iti polusion iti angin.
Ti Urban Island Heat Effect ket ti nangato a temperatura a mapaspasaran ti kaaduan a lugar iti siudad.
Idiay Metro Manila, karaman kadagiti green spaces a mabalin a pagturongan ti publiko ket ti Arroceros Forest Park, UP Academic Oval, People’s Park, Greenway Park, Ayala Triangle Gardens, Estero Tripa de Gallina, Filinvest City Central Park.
Iti agdama, agtultuloy ti panangipatungpal ti Department of Environment and Natural Resources ti nagduduma a programas a kas ti Enhanced National Greening Program.
Nasurok 1.8 billion a bin-i ti naimula iti 2.17 million nga ektarya ti daga iti pagilian manipod idi nangrugi ti programa idi tawen 2011.
Sigun iti state weather bureau Philippine Atmospheric, Geophysical and Astronomical Services Administration, ti temperatura iti nagduduma a lugar iti pagilian ket nalab-awan dagiti projection dagitoy para iti bulan ti Abril.
Nagballaag ti nasao nga ahensia a ti kapudutan nga aldaw ket posible a mapasaran pay inton Mayo.
Manipod idi tawen 2010 agingga 2020, ti average heat index iti Pilipinas ket dumandanon laeng iti 37°C, nabababa ngem ti mapaspasaran iti agdama a panawen.
