Dandani dumanon iti P16 trillion ti utang ti pagilian a Pilipinas iti baet ti agtultuloy a fundraising efforts ti gobyerno.
Maibasar iti kaudian a rekord nga inruar ti Bureau of the Treasury, ti utang ti national government ket dimmanon iti P15.893 trillion pesos agingga idi ngudo ti Setyembre ita a tawen.
Ngimmato daytoy iti 2.2% manipud iti P15.55 trillion a nairekord idi ngudo ti Agosto ita a tawen.
Nupay kasta, kinuna ti Bureau of the Treasury a “manageable” paylaeng ti nasao a gatad.
Immunan a kinuna ni Finance Secretary Ralph Recto a posible a ngumato pay ti utang ti pagilian iti P20 trillion iti panagleppas ti termino ni President Ferdinand Marcos Jr inton 2028.
Karaman kadagiti nakaaramatan ti nautang a pundo ket iti panagresponde iti COVID-19 pandemic.
