BAGUIO CITY – Dandanin malpas ti validation ken finalization phase ti maikatlo a National Household Targeting System for Poverty Reduction wenno Listahanan 3 ti DSWD-Cordillera.
Puntirya ti proyekto a mapili dagiti nakukurapay a pamilya a posible nga agbalin a benepisyaryo dagiti programa ti ahensia ita a tawen.
Sigun kenni Marifil Jugal, dadaulo ti Planning Unit ti DSWD-Cordillera, manarimaan ti initial listing kadagiti nakukurapay a pamilya kas maibasar ti assessment dagitoy ken dumanonen iti nasurok 28,700 a pagtaengan ti naipasidong iti assessment ken encoding.
Kinunana a gapu iti daytoy ket agbirbirokda ti 154 nga area supervisors ken 91 nga enumerators a mangawat kadagiti pakaseknan weno reklamo dagiti households apaman a maipablaak ti inisyal a listaan ti Listahanan 3.
Impanamnama met ni DSWD-Cordillera Regional Director Leo Quintilla a patas ti panakapili dagiti mairaman iti Listahanan 3.
Inlawlawagna pay a napateg ti Listahanan 3 iti panangbukel dagiti lokal a gobyeno ken nagduduma nga ahensia iti plano ken programa para kadagiti nakukurapay nga umili ti rehion Cordillera.
