Nakaskediul a sumangbay ni Archbishop Paul Richard Gallagher, ti Vatican Secretary for Relations with the States of the Holy See iti pagilian a Pilipinas ita a lawas, sigun iti Department of Foreign Affairs (DFA).
Ti panagbisita ni Archbishop Gallagher ket isu ti kaunaan nga official visit ti maysa a Vatican foreign minister iti pagilian kalpasan ti pito pulo a tawen nu sadino agiyan daytoy iti las-od ti lima nga aldaw.
Naituding nga iti panagbisita ni Archbishop Gallagher ket kasinnarakna ni President Ferdinand Marcos Jr. kasta met ni Department of Foreign Affairs Secretary Enrique Manalo tapno pagtalantananda ti kooperation ti Holy See ken ti pagilian maipapan iti edukasyon, migration governance, climate change ken daduma pay.
Malaksid iti dayta, agserbi met laeng ti nasao a meeting para iti panagitandudoda iti kappia, human rights, rule of law ken sustainable development.
Kabayatanna, naituding a makipaset ni Archbishop Gallagher iti makatawen a selebrasyon ti “Pope’s Day” da St. Peter ken St. Paul iti Apostolic Nunciature idiay Manila.
Mangipaay met laeng daytoy iti plenary session iti Catholic Bishops’ Conference of the Philippines (CBCP) a maangay idiay Bukidnon province kasta met a mangibinglay daytoy iti lecture maipapan iti “Moral Governance and Ethical Leadership” kas paset ti Mabini Dialogue series iti Foreign Service Institute of the Department of Foreign Affairs (DFA).
