BAGUIO CITY – Umad-ado ita ti basura iti siudad ti Baguio nu idilig iti napalpalabas a tawen.
Iti interview ti Bombo Radyo kenni Eugene Buyucan, City General Services Officer, dumanonen iti 450 agingga 570 a tonelada ti makolkolektar, kas maibasar iti waste characterization study wenno panagadal dagitoy.
Daytoy ket gaputa saan a mailibak a “tourist haven,” “educational center of the north” ken ngumatngato ti populasion ti siudad ti Baguio. Maibasar paylaeng iti panagadal, maysa a kilo ti maibelbelleng ti maysa nga indibidual iti siudad.
Gapu iti dayta, ngumatngato met ti pondo a mailatlatang tunggal tawen para iti panangibelleng ti basura.
Iti rekord ti nasao nga opisina, dumanonen iti agarup 170 milion a pondo ti naaprobaran ita a tawen para laeng iti hauling wenno agarup 225 milion tunggal tawen tapno maakomodar ti basura ditoy siudad.
Gapu iti dayta, pinalagipanna iti publiko nga agbalin a responsable nga indibidual iti panangibelleng ti basura.
