BAGUIO CITY – Naipatuloden kadagiti nagduduma a probinsia ti rehion Cordillera dagiti volunteer teachers wenno para-teachers a tumulong iti implementasion ti distance learning a baro a wagas ti panagadal dagiti estudyante ita a panawen ti pandemya.
Maibasar iti report, nagtaud dagiti volunteer teachers iti nagduduma nga ahensia ti gobierno ditoy lokalidad no sadino naipaima kadakuada dagiti learning packets pakairamanan ti nainsigudan a bag wenno “pasiking”.
Indauluan met dagiti dadaulo ti nagduduma nga stakeholders ti nasao a programa ti naipatungpal a send-off ceremony para kadagiti mannursuro itay nabiit.
Guyguyoguyen met ni Police Regional Office Cordillera Regional Director PBGen. R’win Pagkalinawan dagiti miyembro dagitoy iti panagserbida kas para-teachers kas nailanad iti napirmaan a katulagan iti nagbaetan dagiti panakabagi linteg ken ti Dep-Ed-Cordillera.
