Naannayas ken generally peaceful ti kaleppas a 2025 National ken local elections iti rehiyon Cordillera.
Iti panakiuman ti Bombo Radyo kenni Atty. Julius Torres, Regional Director ti Commission on Elections-Cordillera, kinunana nga iti laksid a napasamak ti shooting incidents ken mauling incidents sadiay Abra iti aldaw ti eleksyon ket saan daytoy a nagbalin a lapped rason a naituloy ladta ti panagbobotos.
Sigun kenni Atty. Torres, amin a presinto iti rehiyon Cordillera ket nag-open para iti panagbotos dagiti botante.
Nasayaat met ti nagbalin a feedback dagiti senior citizens, dagiti masikog ken dagiti person with disabilities a nag-avail iti early voting manipud alas 5:00 ti agsapa agingga alas 7:00 ti agsapa nangruna ket ita laeng nga eleksyon a naipatungpal ti dua nga oras a nasapa a panagbotos dagitoy.
Para iti voter turnouts nationwide ita nga eleksyon, kinunana ni Atty. Torres a daytoy ket dumanon iti 81.65% nangatngato no idilig kadagiti napalpalabas nga eleksyon.
Iti rehiyon Cordillera, ti voter turnouts ket 85.64%, nangatngato no idilig iti nationwide turnout.
Innayon ni Atty. Torres, nga iti Cordillera, ti probinsya ti Abra ti addaan iti kangatoan a turnout a 91%, mangipaspasimudaag nga iti laksid dagiti ado a pakaseknan a mapaspasamak sadiay ket ado ladta dagiti botante a kayatda a makipaset iti eleksyon wenno agbotos para iti panagpilida iti sumaruno a lider a mangidaulo kadagitoy.
