Inlawlawag ni Vice President Sara Duterte a saan a nagaplikar ti interim release idiay Australia ni sigud a President Rodrigo Duterte nga agdama a nakabalud iti International Criminal Court.
Immuna a kinuna ti gobierno ti Australia a saan nga agserbi a host country iti kiddaw ni Duterte a temporary release ken saanna pay nga ikonsiderar ti panangsangaili iti sigud a presidente ti Pilipinas.
Sigun pay iti bise presidente, saan a karaman ti Australia kadagiti dua a pagilian a dinakamat ti defense team iti kiddawna nga interim release iti sanguanan ti International Criminal Court.
Inlawlawag daytoy ni Vice President Sara kasaruno ti nakaawatna nga email manipod iti maysa nga ahensia ti gobierno ti Australia a mangibagbaga kenkuana a nagkedkedda a mangawat iti amana.
Iti maysa nga interview ti bise presidente idiay Melbourne, Australia, kinunana a ti personal a panagbiahena ket saan a tapno agkiddaw ti interim release para iti amana.
