Agyamyaman dagiti Persons With Disabilities, indigents, senior citizen ken solo parents iti naawatda a sangapulo a kilo a bagas nga iti agdama ket mailaklako iti Php29 tunggal kilo iti Kadiwa ng Pangulo sa National Irrigation Administration-CAR sadiay Wangal La Trinidad, Benguet.
Sigun kadagiti benepisyaryo a nakauman ti Bombo Radyo,nasapada a nagturong iti nasao a lugar tapno gundwayan ti programa nu sadino, imbinglayda a dakkel a tulong para kadakuada daytoy nangruna ta iti agdama ket nanginan ti presyo iti bagas.
Malaksid it bagas, innayon dagiti benepisyaryo a nakagatangda metlaeng iti natnateng iti KADIWA.
Kagiddan dayta, mangnamnama dagitoy nga adda pay ti kapada a programa a maipatungpal para kadakuada kadagiti sumarsaruno pay a gundaway.
Iti sabali a bangir, imbinglay ni Engineer Chrisanta Beray, Head Operations and Maintenance Unit ti National Irrigation Administration-Cordillera a sangaribo limagasut ti namnamaenda a bilang dagiti dumar-ay iti nadakamat nga aktibidad.
Pakairamanan dayta dagiti nakalista nga benepisyaryo manipod kadagiti nagduduma a babbarangay iti La Trinidad, ken dagiti walk-in beneficiaries wenno dagiti saan a nakapagpalista.
Malaksid kadagiti walk-ins manipod iti nadakamat a munsipyo, adu metlaeng dagiti nakidar-ay a nagtaud iti kabangibang a lugar kas iti siudad iti Baguio, Munsipyo iti Tublay, ken iti Sablan.
Kagiddan dayta, inlawlawag ni Engr. Beray a saan a kaspaulan a nakalista ti nagan dagiti paayanda iti bagas nu sadino, iyakomodarda latta ti dagiti walk-ins laketdi umdas pay ti tallo a ribo a sako ti bagas nga insaganada para iti nasao a programa.//Bombo Jez Lapizar
