![](https://img.bomboradyo.com/baguio/2021/07/206347409_3790758911032609_7649968586587899183_n-1.jpg)
BAGUIO CITY -Mabalinen nga agibaba iti pasahero iti sangwanan ti Insular Life Building iti sangwanan ti Baguio City Hall ken iti asideg ti Bureau of Fire Protection-Baguio dagiti parapasahero a jeep nga addaan ruta a La Trinidad-Bokawkan.
Nakedngan daytoy iti kaudian a taripnong ti Baguio Traffic Management Working Group.
Nangrugi ti nasao a window hour ita nga aldaw ti Biyernes, July 9.
Maibasar iti desisyon, mangrugi ti window hour iti alas-sais trenta (6:30) agginga alas-otso trenta (8:30) iti agsapa ken iti alas-dies (10:00) ti agsapa agingga alas-tres (3:00) ti malem.
Maipalagip a kiniddaw dagiti opisyales ti La Trinidad ti panakaipatungpal ti nasao a window hour kas panangsuportarda kadagiti pasahero ken kadagiti operators ken drivers dagiti parapasahero a jeep tapnu saan unay a marigatan dagitoy nangruna dagiti addaan ti bagahe.
Kiniddawda ti nasao a banag idi dimmar-ay da Engr. Ted Tan, miembro ti Baguio Traffic Technical Working Group ken Coun. Benny Bomogao iti sesyon ti Sangguniang Bayan ti La Trinidad, Benguet para iti konsultasyonda iti panakaisimpa ti traffic scheme para kadagiti taxi nga agbibiahe iti lokalidad.