BAGUIO CITY – Mapadayawan inton September 1 kagiddan ti panakarambak ti Baguio Day dagiti barangay a mangabak iti search for cleanest and greenest barangays ita a tawen 2019.
Makaawat iti P100,000 a cash prize ti barangay a mabigbig kas first placer bayat a makaawat iti P75,000 ti second placer ken makaawat met iti P50,000 ti third placer.
Maipaayan met iti sag-P10,000 ken sertipikasyon dagiti pito a barangay bayat a maipaayan iti certificates of appreciation dagiti sangapulo pay a barangay.
Posible met a mapadayawan dagiti babbarangay nga addaan ti nadalus a pagayusan ti danum wenno dagiti addaan ti urban, herbal ken community gardens wenno naisangsangayan a proyekto para iti nakaparsuaan.
Sinarungkaran metten dagiti nabigbig a hurado dagiti amin a 128 a babbarangay ti Baguio.
Maipalagip a ti search for cleanest and greenest barangays ti Baguio ket paset ti programa ti siudad kas maysa a hall-of-famer iti cleanest and greenest highly urbanized city iti pagilian.
