BAGUIO CITY- Ngimmato ti kaso ti dengue iti Baguio City iti 120% manipud Enero agingga Hunyo 6 ti agdama a tawen.
Sigun kenni City Health Services officer Dr. Rowena Galpo, adda ti 216 a kaso ti dengue a nairekord kadagiti nadakamat a bulan, nangatngato nu idilig iti 98 a kaso a nailista idi napan a tawen iti kapada a bulan.
Nupay kasta, awan met ti nailista a pimmusay gapu iti dengue ita a tawen nu idilig iti lima a kaso ti ipupusay a nailista idi napan a tawen.
Dinakamat ni Galpo a nailista ti Atab District Health Centers ti kangatoan a kaso ti dengue fever nga addaan iti 35, sarunoen ti City Camp-33, Asin- 22, Loakan- 19, Engineers Hill – 15, Irisan – 14, Pinsao – 12, Atok Trail – 11, Quirino Hill ken Lucban –sag-siyam, Scout Barrio ken Pacdal – 8, Mines view –7, Quezon Hill – 6, Aurora Hill ken Campo Filipino nga addaan iti sag-uppat a kaso.
Gapu iti daytoy, guyguyoguyen manen ni Galpo dagiti residente ti Baguio City nga agpakonsulta a dagus nu makarikna iti sintomas ti dengue fever kas ti nakaro a gurigor iti uneg ti dua agingga pito nga aldaw, panagbakwar ken daduma pay.
Malaksid iti daytoy, napateg metlaeng nga isustinir ti regular a panagdalus iti uneg ken ruar ti pagtaengan.
