BAGUIO CITY – Naipilan ti nagtutuon a kaso ti mayor ken bise mayor ti Pilar, Abra pakairaman dagiti body guard dagitoy kasaruno ti insidente ti pammaltog a napasamak idi Marso 29.
Maibasar iti report, kaso a panaglabsing iti RA 9208 wenno expanded trafficking in person act ken panaglabsing iti RA 7166 wenno unauthorized employment of bodyguards ti sangoen da Mayor Mark Roland Somero ken ti kabsatna a ni Vice-Mayor Jaja Josefina Disono.
Malaksid iti daytoy, sumango pay iti kaso a panaglabsing iti gun ban ti nasao a Bise Mayor.
Naipila metten ti kaso a panaglabsing iti Art 151 wenno Serious Disobedience of Lawful Orders of Agent of Person in Authority kontra kadagiti sumagmamano a body guard dagiti nadakamat nga opisial pakairaman da Jericho Toreno Bufil, Robert Boreta Toreno, Emmanuel Nicanor Valera ken Sandee Boy Bermudo gapu iti panaglibasda iti PNP ken COMELEC spot checkpoint.
Naipila pay ti kaso a multiple attempted murder kontra kenni Bufil gapu iti maatap a panangpaputokna ti paltog kontra kadagiti personnel ti PNP a mangimanmando iti checkpoint.
Kabayatanna, naipasidong metten iti Gun Powder Residue Test dagiti paltog a nadiskobre ti SOCO team iti lugan dagiti nadakamat a suspek no sadino positibo a naaramat dagitoy iti panakipinnaltog kadagiti otoridad.
Kasaruno iti daytoy, mangnamnama ni Pcol Maly Cula, dadaulo ti Abra PPO, nga ad-adda pay nga agridam ken agalerto dagiti pulis ti Abra a mangipatungpal ti PNP/COMELEC checkpoint aniaman ti kasasaad wenno estado dagiti lumablabas a lugan tapno magun-od ti natalged, umno, patas ken nawaya a national ken local elections.
