BAGUIO CITY – Pimmusay ti duwa nga estudyante kalpasan nga natnag wenno naaksidente ti luganda sadiay Lower Tomay, Bahong La Trinidad itay 1:30 ti parbangun.
Nabigbig dagitoy a da Cedrick Wasit, 25- single, estudyante, driver ti lugan ken ni Rolly Quintino, 24-anyos, estudyante bayat nga manarimaan ti panakataming ni Alzemier Anton Menes, 24-single, estudyane.
Iti interview ti Bombo Radyo Baguio kenni PLT. Anthony Cong-o, Hepe ti Traffic Management Unit ti LTMPS, kinunana nga amin dagiti nabigbig a biktima ket residente ti Palew, Tublay, Benguet.
Kinunana a nagtaud sadiay La Trinidad ti white Wrangler Jeep wenno ti lugan nga inmaneho ni Wasit ken kadwana dagiti duwa nga pasaherona a paturong sadiay Tublay idi napasamak ti insidente.
Maatap a napukawan ti kontrol ti driver iti lugan nangruna ta addaanda ti impluwensia ti arak rason a nabanggana ti riprap iti kurbaan a paset ti kalsada agingga a natnag ti lugan iti agarup 10 a metro ti kaunegna nga rangkis sadiay Lower Tomay, Bahong.
Dagus nga narespondean dagiti biktima ken naiturong iti ospital ngem naideklara nga dead on arrival da Wasit ken Quintino bayat nga addan ita iti stable nga kondisyon ni Menes.
