BAGUIO CITY – Ur-urayen ita ti Department of Health (DOH) – Cordillera ti confirmatory result iti lima a presumptive positive case ti COVID-19 a nailista iti siudad ti Baguio.
Inlawlawag ni DOH-Cordillera regional director Dr. Amelita Pangilinan a ti presumptive positive case ket kaipapananna a nagpositibo iti test iti local level ti sample dagiti pasyente ngem nasken a maipasidong iti testing ti national laboratory, partikular ti Research Institute for Tropical Medicine para iti kumpirmasyon.
Kinunana a maysa kadagiti presumptive positive ket 55-anyos a babae a nakarikna iti sintomas ti COVID idi March 10 ken pimmusay idi March 18 kalpasan nagsubli ditoy Baguio kalpasan a nagbiahe sadiay Quezon City ken Manila.
Innayonna nga agtaltalinaed met ita kadagiti level 3 facilities ditoy Baguio ti tallo a pasyente a presumptive positive bayat a ti maysa ket na-admit iti maysa a Level 3 a pasilidad sadiay National Capital Region.
Sigun kenni Dr. Pangilinan, ti naka-confine iti Level 3 nga ospital sadiay NCR ket 55-anyos a lalaki ket taga-NCR a nagbiahe manipud Makati paturong ditoy Baguio.
Innayonna a dagiti naka-confine iti Level 3 nga ospital ditoy Baguio ket 57-anyos a babae a nagbiahe manipud Manila paturong ditoy siudad, 31-anyos a lalaki a nagbiahe manipud Taguig ken 49-anyos a lalaki a nagbiahe manipud Metro Manila.
Kabayatanna, iti datus ti DOH-Cordillera ket dumanon iti 143 ti PUIs iti rehiyon no sadino, 73 kadagitoy ti nag-negatibo iti coronavirus bayat a 52 dagiti nakaruar iti ospital, 42 ti agdama a naka-confine kadagiti ospital ken 49 dagiti naka-home quarantine.
Iti datus ti DOH-Cordillera, 17 ti PUIs sadiay Abra; 8 sadiay Apayao; 76 iti Baguio City; 20 sadiay Benguet; 2 sadiay Ifugao; 11 sadiay Kalinga; 9 sadiay Mountain Province.
