BAGUIO CITY – Pimmusay ti maysa a pulis bayat a nadangran ti walo a dadduma pay iti panagbettak ti improvised explosive device iti kabambantayan a nagbaetan ti munisipyo ti Bauko ken Tadian sadiay Mountain Province idi kalman.
Sigun kenni Police Major Carolina Lacuata, panakangiwat ti Cordillera PNP, manarimaan ti panangkamkamat ti tropa ti gobyerno kadagiti agliblibas a kameng ti New People’s Army idi bimtak ti bomba nga inkali dagiti rebelde.
Nabigbig ti pimmusay a ni PCpl. Marlon Casil a residente ti Kibungan, Benguet bayat a nabigbig dagiti nadangran a da PCpl. Marcelo Bayeng, PCpl. Ramadick Meloy, PClp. Clifford Gama, PCpl. Edwin Keya, PCpl. John Calcaligong, Pat. Erwin Calixto, PSSgt. Salvador Agallatiw ken PMSgt. Alphedes Alvaro.
Iti agdama, agtultuloy ti operasyon ti nagtipon a pwersa ti militar ken pulisya iti nasao a lugar.
Maipalagip a nangrugi ti operasyon ti tropa ti gobyerno kontra kadagiti rebelde sadiay Montañosa idi napalabas a lawas a nakatayan ti maysa a pulis.
Kabayatanna, iyap-apela met ti lokal a gobyerno ti Mt. Province ti panangikararag ti publiko iti probinsiada para iti panakaragpat ti kappia.
