BAGUIO CITY – Nangrugin ti ten-day moratorium wenno ti saan pay a panakaipalubos ti panagawat ti Kalinga dagiti locally stranded individuals (LSIs) a kayatda ti agawid sadiay.
Nangrugi ti nasao a moratorium idi kalman, August 24 ken agleppas inton September 2 kas maibasar iti kiddaw ti Provincial COVID-19 Inter-Agency Task Force (PIATF) ti Kalinga.
Nakiddaw ti nasao nga addang kasaruno ti panaka-alarma ti PIATF-Kalinga iti killaat a panagngato ti bilang dagiti nagpositibo iti COVID-19 sadiay.
Agtalek ti PIATF-Kalinga a babaen iti nasao nga addang ket maimaton a nasayaat ti overcrowding kadagiti isolation facilities sadiay ken uray pay ti contact tracing.
Maipalagip a killaat a ngimmato ti kaso ti COVID-19 sadiay Kalinga idi August 13 kalpasan ti maysa a religious gathering sadiay Tabuk City a sinaruno ti agarup innaldaw a panakailista ti positibo a kaso ti sakit a nagresulta iti panakapunno dagiti isolation facilities sadiay.
Maituloy ti panagawat ti probinsia kadagiti LSIs nga agawid sadiay inton September 3 ngem kasapulan nga adda ti kaskenan a koordinasyon iti provincial local government unit.
Maibasar iti datus ti Department of Health – Cordillera idi August 23, naartapan ti Kalinga ti 100-mark iti kaso ti COVID-19 kalpasan a nailistada ti 59 nga active cases ken 41 a recoveries.
