Nakaawat iti sangagasut a jeepney drivers iti libre a gasolina manipod iti maysa a barangay a timmulong kadakuada tapno malag-ananada iti epekto ti panagngato iti presio ti produkto a petrolio gapu iti tension a mapaspasamak idiay Middle East.
Nangipaay ti Barangay AZCKO (Abanao, Zandueta, Chugum, Kayang, and Otek) iti dua a litro a disesl iti tunggal kameng iti siam a jeepney organization idi laeng kalman.
Sigun kenni Barangay Captain Jefferson Cheng, ti nasao nga addang ket paset iti social responsibility iti barangayda nangruna ta marikna ti panagngato iti produkto a petrolio gapu iti nasao a mapaspasamak, a mangap-apektar iti pagilian a Pilipinas.
Kinunana nga immuna a naipatungpal ti nasao a proyekto idi June 2022 idi kellaat a ngimmato ti presio ti lana iti pagilian, ken ti pagilian ket agrekrekober paylaeng manipod iti pandemic.
Inlawlawag ni Cheng a saan a nagtaud iti barangayda ti pondo para iti nasao a programa nu diket nagdependeda iti donasion manipod kadagiti stakeholders, nga isu met ti pagyamyamananda kadagiti katinnulongda iti nasao a programa.
Sigun iti maysa a jeepney driver, kadawyan a ti busbusbenna ket P800 agingga P1,000 para iti fuel iti maysa nga aldaw ngem gapu iti panagngato, agbaybayad daytoy ita iti P1,700 ken ti pammastrekanna ket bimmaba iti kagudua, manipod iti P1,000 iti maysa nga aldaw ket nagbalin a P500.
Inyebkasna met ti panagyamanna iti nasao a programa gaputa dakkel a tulong daytoy kadakuada.
