BAGUIO CITY – Naawat dagiti 11 a swine raisers iti Benguet nga addaan taraken a baboy a napapatay gapu iti African Swine Fever (ASF) ti dumanon P228,400 a tulong pinansial manipud iti provincial government.
Personal nga inyawat da Benguet Governor Melchor Diclas, Board Member Atty. Juan Nazarro Jr. ken Provincial Veterinarian Dr. Miriam Tiongan ti nasao a tulong pinansial kadagiti benipisaryo.
Naamuan nga uppat kadagitoy ket residente ti Itogon, sag-tallo a residente ti La Trinidad ken Bokod ken maysa a residente ti Atok, no sadino, dagitoy ti maikapat a grupo dagiti benipisaryo para iti nasao a tulong pinansial.
Mangnamnama met ni Gov. Diclas a makatulong ti nasao a pinansial kadagiti naapektaran nga agtartaraken ti baboy tapnu makapangabaruanan dagitoy.
Impalagipna pay ti panagtungpal dagiti maseknan iti biosecurity measures tapnu maliklikan ti ad-adda a panagwaras ti ASF virus.
Kabayatanna, pagan-annaden met ni Dr. Tiongan dagiti umili manipud iti panaggatangda iti baboy ita a holiday season.
Sigun kenkuana, nasken a dagus a maireport iti lokal a gobyerno dagiti baboy a makitaan ti sintomas ti panagsakit.
Impannakkelna nga iti las-ud ti nasurok makabulan ket awan ti nailista ti Benguet a baro a kaso ti ASF infection.
