BAGUIO CITY – Agpapaimbag ita iti pagagasan ti uppat kadagiti 11 nga agkakabagian kalpasan a nadangran dagitoy idi natnag iti rangkis ti naglugananda a van sadiay Ballan, Bun-ayan, Sabangan, Mountain Province idi kalman.
Sigun kenni PMajor Bernard Wong, dadaulo ti Provincial Investigation and Detective Management Branch ti Mt. Province Police Provincial Office, dagiti biktima ket tallo a lallaki, lima a babbai ken tallo nga ubbing.
Nabigbig ti driver ti van a ni Roger Coytop, 28-anyos, residente ti Camatagan, Sabangan, Mt. Province.
Nabigbig met dagiti 10 a pasahero a da Weiane Aurete Bacataw Andawey, 1-anyos; Edwin Lacad Andawey Jr., 31-anyos; Grishan Decker Andawey Castro, 2-anyos; Charlyn Lacad Mangay-at, 27-anyos; Geralyn Andawey Castro, 24-anyos; Hooph Copatan, 25-anyos; Ann Rhea Bacatan Andawey, 21-anyos; Xander Andawey Mangay, 4-anyos; Roldan Lacad Andawey, 22-anyos ken Elizabeth Ngillod, 60-anyos a bin-ig a residente metlaeng ti Sabangan, Mt. Province.
Sigun kenni Wong, nagtaud ti van sadiay Sabangan ken paturongda sadiay Bontoc ken manarimaan ti panagsalog ti van iti kalsada idi napasamak ti aksidente.
Kinunana a napukaw ti preno ti lugan ken saan a nakontrol ni Coytop ti manibela agingga a natnag ti van iti rangkis nga addaan kauneg a lima a metro.
Dinakamatna a nagasat dagiti pasahero ti van gaputa naidungpar daytoy iti dakkel a puon ti mangga isut gapuna a saan a nagdiretso a natnag iti naun-uneg pay a paset ti rangkis.
Gapu iti insidente, nadangran dagiti biktima ken 10 kadagitoy ket naiturong iti Luis Hora Memorial Regional Hospital bayat a maysa ti naiturong iti Bontoc General Hospital nupay nakaruardan malaksid kadagiti uppat.
Kabayatanna, impeksa dagiti biktima nga awan ti panggepda a mangipila iti kaso kontra iti driver gaputa aksidente ti napasamak.
