Nakailista ti Barangay Irisan, Baguio City iti dua a kaso ti firework-related injuries bayat ti panangsarabo ti baro a tawen.
Maisupadi daytoy iti agwarwaras a damag a tallo a kaso ti nailista iti nasao a barangay.
Iti pannakiuman ti Bombo Radyo kenni Arthur Carlos, Kapitan ti Barangay Irisan, Baguio City, kinunana a dua laeng ti nairekordda a nadangran gapu iti palibang, bayat a ti maibagbaga a maysa a kaso ket napamasak iti Purok 8 idiay Barangay Asin.
Sigun kenni Carlos, dagiti biktima ket nataengan ken agbuybuya laeng iti igid idi nadangran dagitoy.
Iti baet a bassit laeng ti naapektaran kadagiti dua a biktima, kinuna ni Carlos a dagos met a nagturong dagitoy iti pag-agasan para iti dagos a pannakatamingda.
Idi nadamag nu naggatangan dagiti nagpaputok iti palibang, kinuna ni Carlos a nagatang dagitoy iti ruar ti siudad ti Baguio.
Maipalagip a sakbay pay ti baro a tawen, nagrikus dagiti opisial ti Barangay Irisan, Baguio City kaduada dagiti kameng ti Baguio City Police Office-Police Station 9, ken dagiti tanod tapno ibaga a nainget a maipawil ti agaramat ken gumatang ti palibang iti siudad kas maitunos iti pammilin ni Baguio City Mayor Benjamin Magalong.
Nupay kasta, adda latta ti nailista a nadangran iti siudad.
Gapu iti dayta, isingsingasing ti kapitan a maparitan kuma a sumrek iti siudad ti Baguio dagiti indibidual a nakagatang ti paputok nangruna kadagiti nagtaud idiay Bulacan ken dadduma pay a lugar tapno mairekord ti zero firework-related injuries.
