BAGUIO CITY – Nasarakan ti maysa a bangkay ti lalaki sadiay Sipitan, Tadiangan, Tuba, Benguet idi agsapa kalman.
Sigun kenni Police Major James Acod, hepe ti Tuba PNP, nakaawat ti opisinada iti report manipod iti maysa a barangay tanod seknan iti nasarakan a bangkay ti lalaki.
Nasarakan met dagiti nagresponde a pulis ti nasao a bangkay a naibelleng iti maysa rangkis nga addaan kauneg a 40 a kadapan.
Nakasuot ti bangkay iti puraw a sapatos ken medyas, brown a jogger pants, sports underwear, asul a t-shirt a nasurakan ti ‘I Love Philippines’ ken brown a maong a jacket.
Addaan ti bangkay iti tribal tattoo nga addan puso iti kanawan a takiag ken tuldok a tattoo iti kanigid a wrist wenno pungupunguan.
Kinuna pay ni Major Acod nga adda ti nakapkap a dua a pakete ti maatap a shabu manipud iti nasao a bangkay.
Manarimaan metten ti panakaiproseso ti nasao a bangkay para iti kanayonan nga imbestigasyon.
