BAGUIO CITY – Nakemmeg ti dua a wanted persons sadiay Tabuk City, Kalinga idi kanikadua iti nagsina nga operasyon dagiti otoridad a panag-anop kadagiti wanted nga indibidual.
Immuna a nakemmeg sadiay Purok 7, Bulanao ti wanted person a ni Gaspar Edduba, naasawaan ken awanan trabaho a sumangsango iti kaso a murder.
Naamuan a ni Edduba ti suspek iti maysa a kaso ti pammaltog sadiay Roxas, Isabela.
Simmaruno a nakemmeg iti national highway sadiay Barangay Agbannawag ti wanted person a ni Dexter Pudayan, naasawaan ken mannalon gapu iti sangsangwenna a kaso a panaglabsing iti Presidential Decree 1096 wenno ti National Building Code of the Philippines.
Kinuna met ni Tabuk City Chief of Police, PLt.Col. Radino Bell nga itultuloyda latta ti panag-anop kadagiti maan-anop nga indibidual nga agingga ita ket aglemlemmeng iti ima ti linteg.
Kagiddan iti daytoy, inyapelana kadagiti addaan ti warrant of arrest iti panagsuko dagitoy tapnu makaliklikda iti saan a mapadpadaanan nga insidente wenno ti nadara nga engkwentro.
