BAGUIO CITY – Naduktalan nga agam-amo ti maikatlo ken maikawalo a bangkay a nasarakan ken narekober sadiay Poyopoy, Taloy Sur, Tuba, Benguet babaen iti imbestigasyon ti Benguet Police Provincial Office.
Kinumpirmar daytoy ni Police Colonel Elmer Ragay, dadaulo ti Benguet PPO nupay nagkedked nga agipaay iti kanayonan nga impormasyon no anya ti koneksion ti dua.
Immunan a nabigbig dagiti dua a bangkay a da Kent Charlie Licyayo, 22-anyos, tubo ti Hingyon, Ifugao ken residente ti Hilltop, Baguio City ken Fahad Manan Macalanggan, 28-anyos, maysa a Maranao ken residente ti Crystal Cave, Baguio City.
Kinunana a mangisayangkatda pay iti operational research wenno complete background investigastion tapnu maamuan ti pakasaritaan ken napalpalabas a kaso da Licyayo ken Macalanggan.
Maibasar iti report ti Benguet PPO, agpada a naudi a nakita dagiti dua idi October 8, partikular ni Licyayo iti maysa a bus terminal ditoy Baguio bayat a ni Macalanggan ket iti pagtaenganda.
Innayon pay ni Col. Ragay nga arigna sipat kadagiti peace-loving people ti Benguet ti insidente.
Sigubn kenkuana, awan ti dadduma a tarigagayna ken ti dadaulo ti pulisya iti Cordillera no saan a ti panakalawlawag ti pudno a napasamak tapnu maduktalan dagiti perpetrators ken maiserbi ti hustisya.
Pinaglibakanna pay ti aniaman a kapanunutan wenno sayangguseng nga adda pakainaigan ti pulisya wenno dagiti vigilante iti napasamak kadagiti nasao a bangkay.
Maipalagip nga addan ti binukel ti Benguet PPO a task force a mangtutuk iti insidente.
