BAGUIO CITY – Nagpositibo ti dua a konduktor ken maysa a bus driver ditoy Baguio City iti inisyal a drug test a paset ti simultaneous Oplan Huli Week ti Philippine Drug Enforcement Agency (PDEA) idi kalman.
Iti panakiyuman ti Bombo Radyo Baguio, kinuna ni Rosel Sarmiento, information officer ti PDEA-Cordillera a naipasidong iti suprise drug test ti 252 dagiti bus drivers ken konduktor nga agbibiahe ditoy City of Pines.
Kinunana a naipasidong manen iti confirmatory drug test dagiti tallo ken maamuan ti resulta iti uneg ti 72 hours wenno tallo nga aldaw.
Dinakamatna a saan a napalubusan ti panagbiahe dagiti nasao nga indibidual.
Panggep ti drug test a maipasigurado ti kinatalged dagiti pasahero dagiti bus nangruna dagiti agbibiahe iti aadayo a destinasyon ita a Summer Vacation ken Semana Santa.
Innayon ni Sarmiento nga adda dagiti drivers nga agar-aramat ti iligal a droga iti panagbiaheda a mangituntunda met iti peggad kadagiti pasahero.
