BAGUIO CITY – Nakemmeg ti dua a turista manipud Guiguinto, Bulacan gapu iti panangimet ken panangibiaheda iti iligal a droga, partikular ti marijuana iti naisayangkat a checkpoint operation sadiay Samoki, Bontoc, Mountain Province idi kanikadua.
Nabigbig dagitoy a da Rufino Tenedero Marmito Jr., 20-anyos, baro, tricycle driver ken Ernie Leongson, 24-anyos, baro, call center agent.
Nakumpiskar kadagitoy ti 12 a bricks ken tubular forms ti napagango a bulong ti marijuana nga addaan gatad a P984,000.
Sumango ita dagiti dua iti kaso a panaglabsing iti Republic Act 9165 wenno ti Comprehensive Dangerous Drugs Act of 2002.
Kabayatanna, pinarut ken inuram dagiti otoridad ti nasurok P4-M a gatad ti marijuana iti naisayangkat nga eradication operation sadiay Sagubo, Tacadang, Kibungan, Benguet.
Sigun kadagiti otoridad, kabayatan ti panagpatrolyada iti plantation site a pakaisaysayangkatan ti operasyon ket nadiskobreda dagiti naapit ken mapag-pagango a marijuana plants.
