Pimmusay ti dua pulo ket lima a Palestinians idiay Gaza Strip kalpasan ti impatungpal nga airstrike ti Israel a nakatayan ti agarup walo manipod iti apartment iti Nuseirat refugee camp ken agarup sangapulo, pakairamanan ti pito nga ubbing iti ili ti Jabalia.
Manarimaan latta met ti pannakisarita dagiti “mediators” wenno mangibabaet kadagiti dadaulo ti Israel ken ti Islamist group a Hamas tapno sumardeng ti gubat, kalpasan ti nasurok maysa a tawen a panagsusupiat dagitoy.
Maibasar iti maysa a report, nabalinan ti Qatar ken Egypt a risuten ti sumagmamano a nagdumaan iti nagbaetan dagiti dua a partido ngem nagtalinaed dagiti “sticking points.”
Maipalagip a rinugian ti Israel ti panangraut iti Gaza kalpasan a rinaut dagiti Hamas dagiti komunidad ti Israel idi Okt. 7, 2023, a nakatayan ti 1,200 a tattao ken nangala iti 250 a hostage, maibasar iti bilang ti Israel.
Kinuna pay ti Israel nga agarup sangagasut a hostage ti nakabalud pay laeng, ngem saan a nalawag no mano ti sibibiag.
Sigun met kadagiti otoridad idiay Gaza, pimmusay ti nasurok 45,000 a Palestinians ken nangpapanaw kadagiti 2.3 milyon gapu iti kampania ti Israel sadiay.
