Balligi a nakemmeg ti 25-anyos a suspek iti naipatungpal a search warrant idiay Purok 10, Pinget, Baguio City idi laeng kalman.
Nabigbig daytoy a ni Dexter Imingan, awanan trabaho, ken agnanaed idiay no.11 Purok 10, Pinget, Baguio City.
Nakemmeg daytoy ket babaen iti nagtipon a pwersa dagiti otoridad manipud iti Baguio City Police Office- City Drug Enforcement Unit, Criminal Investigation Unit, ken dadduma pay a yunit ti pulisya iti siudad.
Nagresulta metlaeng ti operasyon iti pannakakumpiskar dagiti sangapulo a transparent plastic sachets ti maatap a shabu nga agdagsen iti 15 grams nga aggatad iti P102,000, maysa a baso ti maatap a crush marijuana leaves nga agdagsen iti 5 gramo nga aggatad iti P600 ken cartoon a naglaon metlaeng iti crush marijuana leaves nga aggatad iti P360.
Malaksid iti dayta, nakumpiskar metlaeng iti suspek dagiti non-drug evidence pakairamanan ti dua nga improvised tooter, maysa a roll foil, maysa a pakete ti transparent plastic ken dadduma pay a kagawaan.
