Naimatangan ti tallo a barko ti China Coast Guard iti 35 nautical miles wenno 65 kilometro manipud El Nido, Palawan idi kalman ti agsapa.
Nailadawan ti kaadda ti barko kas “concerning” ken “show of strength” bayat nga agtultuloy ti panangikalintegan ti China a kukuada ti teritorio ti Pilipinas.
Sigun kenni maritime security expert Raymond Powell, nagtaud dagiti barko ti China idiay Scarborough Shoal ken nagdalan iti El Nido iti igid laeng ti maaw-awagan a nine-dash line ti China, a saan a bigbigbigen ti Permanent Court of Arbitration.
Ti kaudian nga insidente ket napasamak makalawas laeng kalpasan a naimatangan ti maysa a Chinese research vessel iti asideg ti Palawan, nu sadinno, inlawlawag ti Philippine Navy a sinurotna laeng ti pagalagadan gaputa masapul a liklikan ti barko ti dakes a kasasaad ti paniempo.
Kabayatanna, itay laeng nabiit ket kiniddaw ni maritime expert Jay Batongbacal ti agdama nga administrasion a kombinsirin ti dadduma a pagilian tapno awagan ti United Nations (UN), nga addaan ti 193 member states, nga agtignay.
Nupay kasta, patien ni Batongbacal a saan nga agargaraw ti United Nation gaputa kaaduan kadagiti kameng kadagitoy ken naimpluwensiaan ti China.
