BAGUIO CITY – Nakemmeg ti tallo nga indibidual, pakairamanan ti maysa a high value individual a drug personality iti nagsisina a buy-bust operation ng insayangkat dagiti otoridad ditoy siudad ti Baguio itay nabiit.
Nakemmeg sadiay East Modern Site, Aurora Hill ni Jeremie Valenzuela Sap-ay alyas Tangkad, 37-anyos, baro, construction worker ken residente ti East Modern Site, Aurora Hill, Baguio City a maibilbilang a high value individual.
Nakumpiskar kenkuana ti maysa a pakete ti maatap a shabu nga agdagsen iti 0.30 grams.
Naamuan a sigud a drug surrenderee ti Baguio City Police Office – Station 6 ni Sap-ay.
Nakemmeg met iti maysa a mall sadiay San Luis Village Barangay ti maysa a driver a nabigbig a ni Rommel LLanes Baucas, 52-anyos, naasawaan ken residente ti Puguis, La Trinidad, Benguet.
Nakumpiskar kenkuana ti tallo a pakete ti maatap a shabu nga agdagsen ti pakabuklan a 1.6 a gramo.
Maudi a nakemmeg ni Eleonor Zeta Diaz, 30-anyos, naasawaan, house keeper ken residente ti Purok 6, Asin Road kalpasan a nangilako iti maysa a pakete ti maatap a shabu nga agdagsen ti 5 grams kadagiti otoridad iti nasao a lugar.
Nakumpiskar pay iti ikotna ti kanayunan a maysa a pakete ti walo a gramo ti maatap shabu ken dua a drug paraphernalia.
Nakumpiskar metlaeng kadagiti tallo dagiti cellphone nga inaramatda iti transaksionda kadagiti otoridad bayat a narekober kadagitoy dagiti naaramat a buy-bust money.
Sumangsango metten dagiti tallo iti kaso a panaglabsing iti RA 9165 wenno ti Comprehensive Dangerous Drugs Act of 2002.
