BAGUIO CITY – Nakemmeg ti dua a wanted persons a miembro ti Sigyep Carnapping Group babaen iti man-hunt operation nga insayangkat dagiti otoridad sadiay Crystal Cave, Bakakeng, Baguio City idi kalman.
Nabigbig dagitoy a da Joramil Valencia alyas Ramil Ramos, 37-anyos, naasawaan, construction worker, tubo ti Poblacion, Alilem, Ilocos Sur ken Ruth Maxwel alyas Ruth Malag, 46-anyos, naasawaan, tubo ti Poblacion, Banayoyo, Ilocos Sur.
Nailista dagitoy a maikadua ken maikatlo a wanted persons ti Regional Highway Patrol Unit 1 ken awan ti nairekomendar a piyansa dagitoy.
Nakemmeg dagiti naso nga indibidual babaen iti bileg ti warrant of arrest nga impaulog ti korte ken inserbi dagiti nagtipon a puwersa iti Baguio City Police – Station 10, PNP-Highway Patrol Group – Ilocos Sur ken Sugpon Municipal Police Station.
Naiturongen dagiti suspek ti kustodiya iti BCPO station 10 ken naituding a maipaima dagitoy iti korte sadiay Ilocos Sur.
Kabayatanna, nakemmeg ti maysa a wanted person ken target list ti PNP-Regional Higway Patrol Unit – Cordillera sadiay New Site, Bakakeng Sur, Baguio City gapu iti kasona a carnapping.
Nabigbig daytoy a ni Roxan Dela Cruz Dauz alyas Dawn Caramas Sison, 35-anyos, self-employed ken residente ti Upper Malvar, Trancoville, Baguio City.
Nakemmeg daytoy babaen ti bileg ti warrant of arrest nga impaulog ti korte ditoy siudad idi July 27, 2020.
Narekomendaran daytoy iti piyansa a P300,000.
Naiturong metten ti nasao nga indibidual iti kustodiya ti pulisya para ti umno a disposisyon ti kaso.
