BAGUIO CITY – Natiliw ti tallo a mannalon, pakairamanan ti maysa a menor-de-edad a naduktalan a marijuana dealers iti buy-bust operation nga insayangkat dagiti operatiba ti PDEA ken PNP sadiay Tuba, Benguet idi kalman.
Nabigbig dagitoy a da Laista Ligawan Pedro, 20-anyos, residente ti Tacadang, Kibungan, Benguet ken Jimmer Sawasi Bedkingan, 27-anyos, tubo ti Tacadang, Kibungan ngem residente ti Poblacion, Atok, Benguet ken ti kadwada a 17-anyos a residente ti Ambassador, Tublay, Benguet.
Nakumpiskar kadagitoy ti 20 a kilo dagiti napagango a bulong ken tulang ti marijuana nga aggatad ti P2.46-M.
Nakumpiskar pay ti tamaraw FX nga inaramat dagiti suspek iti panakitransaksionda iti operatiba ti PDEA.
Narekober pay iti ikot dagiti tallo ti naaramat a buy-bust money.
Naamuan a dua a bulan nga inwanwanawan dagiti otoridad dagiti nasao a drug personalities gapu iti panagilakoda iti iligal a droga.
Naamuan pay a nagtaud sadiay Kibungan, Benguet dagiti nakumpiskar nga iligal a droga.
Iti agdama, sumangsangon dagiti tallo iti kaso a panaglabsing iti RA 9165 wenno Comprehensive Dangerous Drugs Act of 2002.
