BAGUIO CITY – Simmuko iti tropa ti gobyerno ti tallo a regular a miembro ti Komiteng Larangang Guerilla – Abra-Mountain Province-Ilocos Sur (KLG-AMPIS) ti New People’s Army (NPA) ken dua nga NPA in the Barrio iti nagsina a lugar ditoy Rehion Cordillera idi kanikadua.
Kasaruno daytoy ti ipupusay ti maysa a lider ken maysa nga intelligence officer ti nasao a grupo iti panakirinnupakda iti tropa ti gobyerno sadiay Gueday, Besao, Mountain Province itay laeng nabiit.
Naamuan a dagiti simmuko a tallo a regular a miembro ti NPA ket bin-ig a residente ti Besao, Mountain Province ken insuko pay dagitoy ti tallo a de kalibre a rifle ken bala.
Insuko met dagiti dua nga NPA in the Barrio a residente Lacub ken Tubo sadiay Abra ti dua a de kalibre a rifle, innem a magazine, 69 cartridges ti bala ken maysa a bandolier.
Sigun kenni Brigadier General Luis Rex Bergante, Acting Commander ti 7th Infantry Division, Philippine Army, ti agtultuloy a panagsuko dagiti miembro ti KLG-AMPIS ti NPA ket resulta ti awan sarday a panagtrabaho ti Regional Task Force on Ending Local Communist Armed Conflict ditoy Cordillera, ti implementasyon ti Joint AFP-PNP Community Support Program ken ti napigsa a suporta a maaw-awat dagitoy manipud kadagiti komunidad.
Dinakamatna pay dagiti balligi a combat operation ti tropa ti gobyerno a nagresulta iti panakaparmek ti maysa a lider ken intelligence officer ti KLG-AMPIS ti NPA.
Innayonna a dakkel a pukaw iti rebelde a grupo ti panakapasag dagiti nasao a personalidad.
Al-allukuyenna pay dagiti nabatbati a miembro ti NPA iti panagsuko dagitoy gaputa adda dagiti napipintas nga oportunidad nga agur-uray kadagitoy iti sidong ti gobyerno.
