BAGUIO CITY – Nakemmeg ti tallo a target listed drug personalities iti panakaipatungpal ti search warrants iti tallo a nagsisina nga operasyon dagiti otoridad sadiay Lacnog, Tabuk City, Kalinga idi kalman.
Immuna a nakemmeg ni SIXTO WACNANG AYONG JR, alyas Jun Jun, 30-anyos, mannalon, nakalista a maysa a high value individual ken regional top most wanted gapu iti iligal a droga.
Nakumpiskar iti kustodiyana ti agarup 10 a gramo ti mapapati a shabu nga aggatad ti P70,000 ken maysa nga airsoft M4A1 Carbine caliber 5.56 mm.
Simmaruno a nakemmeg ni VENNIE ALAVA NATIVIDAD, 33-anyos, mannalon, benipisaryo ti Social Amelioration Program ken nakalista a street level drug personality.
Nakumpiskar iti kustodiyana ti mapapati a shabu nga aggatad ti P35,000 ken maysa a weighing scale.
Naudi a nakemmeg ni WAKAR BAYAWOC LANGNGAG, 60-anyos, mannalon ken nakalista a street level drug personality.
Nakumpiskar met iti kustodiyana ti mapapati a shabu nga aggatad ti P6,000; pakete ti sigariloy a naglaon ti lima a plastik a pakete ken maysa a plastic container a naglaon ti innem a naaramat a plastic a pakete nga addaan ti residue.
Naipasidong dagiti tallo iti kaskenan a dokumentasyon ken sumangsangoda metten iti kaso a panaglabsing iti Comprehensive Dangerous Drugs Act of 2002.
