BAGUIO CITY – Nagleppasen ita nga aldaw ti tallo nga aldaw nga Aggressive Community Testing ti lokal a gobyerno ti Baguio a naisayangkat iti grandstand ti Melvin Jones ditoy siudad.
Pinuntirya ti aktibidad ti panakaipasidong iti RT-PCR test ti 3,000 nga umili iti siudad, partikular dagiti karaman kadagiti risk groups kas kadagiti uniformed personnel, empleyado dagiti pribado a clinic wenno dialysis clinic, construction workers, eatery/food handlers, vendors ken porters iti merkado, BHERTs, dagiti gwardia, empleyado dagiti bangko, BPOs, contact tracers ken personnel dagiti line agencies ken ti city government.
Sigun kenni Aileen Refuerzo, dadaulo ti Public Information Office ti city government, babaen iti nasao nga addang ket masustinir ti prevent, detect, isolate, test, reintegrate wenno PDITR strategy ti Baguio a maysa nga addang kontra iti Delta variant nangruna kadagiti maibilbilang a narisgo a sektor.
Immuna metten nga inyunay-unay ni Mayor Benjamin Magalong ti kinapateg ti community testing tapnu maamuan no asino dagiti nakaptan wenno nakaimet ti coronavirus.
Maibasar pay iti datus, 503 dagiti naipasidong iti RT-PCR testing idi Huwebes bayat a 500 idi kalman ken manipud idi agsapa agingga iti alas dose idi pangaldaw ket 197 dagiti naipasidong iti nasao a test wenno pakabuklan amin ti 1,002.
Naituding met a rumwar ti resulta ti swab test kalpasan ti maysa wenno dua nga aldaw bayat a maisubli iti Bases Conversion Development Authority dagiti saan a naaramat a test kits.
